Në një puthje, e gjithë dija e njeriut

Muajin e kaluar, dy puthje të "mrekullueshme" kanë shëtitur në të gjithë botën. Ata që kanë kryer këtë akt janë George Clooney dhe Richard Gere - praktikisht dy princat e kaltër më seksi të kohës - të cilët kanë ngjallur habi dhe kanë tronditur botën me dy puthje prej "horrash". George i ka dhënë një super puthje për bamirësi. Ai i ka bërë një puthje me buzë të mbyllura gruas së një regjisori të famshëm amerikan, në një garë bamirësie në Festivalin e Kanës. Ndërsa Richard Gere ka puthur në mënyrë të shkujdesshme një yll të "Big Brother" (në versionin Indian), indianen Shilpa Shetty, në një vend të Indisë, ku të fejuarit nuk u japin as dorën femrave kur janë në rrugë. Në një gjyq të Rajastan është urdhëruar menjëherë arrestimi i aktorit, i cili është akuzuar për akte të turpshme në vende publike, ndërsa ekstremistët indianë kanë djegur në rrugë foton e aktorit që kreu aktin.
Mesa duket, në vendet lindore, në ndryshim me ato perëndimore, ka ende diçka të shenjtë në puthje, pavarësisht sjelljeve tona seksuale të lira dhe të shfrenuara: diçka të thellë e të fuqishme. Frojdi thoshte se anatomia është fat dhe në hartën e trurit goja ka një pozicion shumë më të rëndësishëm në lidhje me organet e tjera seksuale (vetëm dora dhe gishtërinjtë zënë një hapësirë analoge në tru). "Çfarë bën për puthjen, një puthje", këtë e tregon një libër, i cili do të dalë në shitje këto ditë dhe titullohet "Puthja", i shkruar nga Alan Montandon, profesor i letërsisë krahasuese në Paris dhe anëtar i Institutit Universitar në Francë. Fillohet me gjimnastikën, sepse puthja është edhe një çështje muskujsh: specialistët thonë se një puthje e thellë përfshin 29 muskuj të fytyrës, ku 17 janë vetëm për gjuhën: veç të tjerash vë në lëvizje 9 miligramë ujë, 0.18 lëndë të yndyrshme, 0.45 kripëra minerale, mijëra baktere dhe miliona mikrobe.
Antropologët, nga ana e tyre, shikojnë te puthja simbolin e një shkëmbimi, ushqyerje, dashurie, por edhe diçka më shumë: pothuajse njësoj si një transfuzion shpirtëror. Si lindin puthjet? Sipas etologut Desmond Morris edhe ne, qeniet njerëzore, e praktikonim të ushqyerin gojë më gojë, siç bëjnë zogjtë, majmunët dhe luaneshat. Nënat tona e përtypnin ushqimin vetë dhe ua jepnin të vegjëlve me gojë. Morris thotë se njeriu e ka praktikuar këtë formë të ushqyerit të paktën për 1 milion vite. Të dashurit që e "eksplorojnë" në mënyrë reciproke gojën me gjuhë, do të vinin re më pas mirëqenien arkaike, ndjenjën e kënaqësisë dhe besimin e të ushqyerit gojë më gojë. Por, kënaqësia e puthjeve është edhe një fakt kimik. Në rastin e "puthjes së parë" (me dikë që na pëlqen shumë) tek individi shfaqet në fakt një "stuhi" e vërtetë, që shkencëtarët i atribuojnë një molekulë feniletilamina (Pea), e cila shkakton efekte të ngjashme me amfetaminat dhe vepron mbi sjelljen dashurore, duke dhuruar prodhimin e dy hormoneve, dopamina, një neurotransmetues që prodhon ndjenja shpërblyese e të këndshme dhe noradrenalina që provokon ngacmimin dhe euforinë.

Marre nga : Gazeta Shqip